GrønlandsBANKENimi ukioq immikkuullarissumi angusaq naammaginartoq  

Sinneqartoorutit kr. 130,9 mio.-nit, taarsigassaqartitsineq qaffasinnerpaaq, piginnittunullu iluanaarutit kr. 45 mio.-nit tassaapput GrønlandsBANKENimi ukiumi immikkuullarissumi aningaasaqarnermi inernerit. Tamanna ukiumoortumik nalunaarusiami ullumi akuerineqartumi takuneqarsinnaavoq.

GrønlandsBANKENip 2020 aallartinnerata nalaani naatsorsuutiginikuuaa akileraarnissaq pitinnagu angusat kr. 120-140 mio. missaaniikkumaartut, eqqarsaatiginaannilu COVID-19 qanoq nalorninartorsiortitsinikuusoq tamanna aningaaserivimmut naammaginartuuvoq.

Aningaaseriviup qajanaatsumik inerneqarnini naammagivaa, nuannaarutigalugulu nalunaarutigaa aktiat ataasiakkaarlugit kr. 25-nik iluanaarutissartaqarmata.

Aningaaserivik siuariartortoq

GrønlandsBANKENip aningaasanik taarsigassaqartitsinera aatsaat taamak annertutigivoq.

– Inuiaqatigiinni inissisimanerput maniguuttuutigaarput aamma nuannaarutigaarput nunatsinni sullitagut peqatigalugit ukioq COVID-19 siullermi qaangiilluaratta, aningaasatigullu taarsigassarsisitsineq siuariartorluarsimalluni, aningaaserivimmi pisortaq Martin Kviesgaard oqarpoq.

GrønlandsBANKENip aningaasanik taarsigassaqartitsinera, qularnaveequtillu kr. 390 mio.-nik qaffapput katillugillu kr. 5.628 mio.-nngorlutik, tamanna aningaaseriviup oqaluttuarisaanni annertunerpaavoq. Aningaasanik taarsigassaqartitsineq aatsaat taamak amerlatigipput, aatsaavissuarlu kr. 4 mia. sinnerlugit.

Aningaaseriviup nammineq aningaasaqarnini kr. 1,2 mia.-nut qaffappai taavalu akiliisinnaassusiata procentia 23,5-nngorluni. Inernerata akileraarnissaq pitinnagu nammineq aningaasaqarneq 11,6 %-mik erniaqartippaa.   

Tunngaviusumik ingerlatsineq inissisimalluarpoq

Aningaaseriviup tunngaviusumik ingerlanera erniat appasittumik inissisimanerat peqqutigalugu sunnerneqarpoq, ukiup ingerlanerata ilaani aningaasat taarsigassarsiat appasinnerupput aamma aningaasartuutit amerliartorlutik. Nalinik nalimmassaanerit aamma appartitsinerit suli pitinnagit inernera kr. 148,9 mio.-nik 2019-imiit kr. 143,6 mio.-nut 2020-mi apparput.

Aningaasatigut naatsorsuutigisamik sulisut amerlinikuupput, soraarnerussutisiaqarnermi tunngasumik aningaasaliinerit, qarasaasianut aamma malittarisassat sukaterneqarneri peqqutaallutik aningaasartuutit amerlipput.

- Tunngaviusumik ingerlatsinerup apparnera nakkutigisassaavoq, naatsorsuutigaarpulli 2021-mi pitsanngorsinnaasoq, Martin Kviesgaard oqarpoq.

Annaasaqarnerit appartitsinerillu killeqarput naak COVID-19 peqqutigalugu appartitsinerit amerlanerugaluartut

Sullitanut appartitsinerit aningaasallu taarsigassanut illikartitsinerit kr. 12,8 mio.-nik qaffapput. Annaasaqarnerit katillugit tamakkiisumik isigissagaanni suli appasipput, kisianni COVID-19 nalorninartorsiortitsinera peqqutigalugu kr. 20 mio.-nit immikkoortitanut sanillullugit annertupput.

- Taakku 20 mio. koruunnit sullitagut ataasiakkaanut nalikilliliinernut qaavatigut immikkoortinneqarnikuupput, mianersortutullu nalilerparput. Sullitagut inuussutissarsiortut amerlanerit aningaasaqarnikkut ingerlalluarput, sullitagullu suliffissaaleqineq peqqutigalugu aningaasanik taarsigassiinerup tungaatigut eqqugaanngillat. Kalaallit Nunaat, pisortallu COVID-19 ajornartorsiortitsinera aqulluarsimavaat. Nunatsinni annertuumik matugallarsimannginnerput naleqartorujussuuvoq, Martin Kviesgaardip oqaatigaa.

GrønlandsBANKENip ukiumoortumik nalunaarusiaa nunarsuaq tamakkerlugu tunillaasuunnermiit sunnerneqarpoq.

- COVID-19 suna tamaat sunnerpaa. Tamakkiisumik nalilersussagukku pigisat tunisanit aamma tuninngisanit, aningaasanik taarsigassiinermi annaasanik, ataasiarlugit aningaasartuutigisanik, nalinik nalimmassaanernut aamma ukiup ilaata ingerlanerani suliassat ikilinerani aningaasartuutigalugit kr. 40-45 mio.-nit annaasaqarpugut, Martin Kviesgaardip oqaatigaa.

Aningaaseriviup pappiliaataat aningaasanik nalillit nalinik iluanaarutitalinnik nalimmassaanerit kingorna kr. 9,6 mio.-niit 2019-imi kr. 0,1 mio.-nut 2020-mi apparput.

2021 siumut nalulersoruminaappoq  

- Nassuerutigissavarput 2021 ineriartornissaa pillugu siumut nalilersornissaa nalorninartuusoq. Isumaqarpunga nunarsuaq tamakkerlugu ineriartorneq qiviaraanni amerlanerit neriulluarlutillu ilimasupiluttartut. Qujanartumik nunatsinni ineriartorneq ajunngippaseqaaq, kisianni aalisakkanut akit sunnerneqaqqapput, aatsitassanik misissuineq aamma nunatsinnut takornariaqartitsinissaq sunnerneqaqqallutik, Martin Kviesgaard oqarpoq.

Siunissaq ungasinnerusoq isigissanaagaanni aningaaseriviup ilimagivaa suliaqarnerit amerlissasut, ilaatigut mittarfinnik sanatitsinerit kingunerisaanik, takornariaqarnermut tunngasunik aningaasaliisoqassasoq aamma inuiaqatiigiinni aningaasaqarnermi privatimut tunngasumut annertusiartussasoq aamma ilimagaat.

- Inuiaqatigiinnut tarrarsuutaavugut. Sullitagut ingerlalluaraangamik aningaaseriviup ingerlaneranut tamanna malunnartarpoq. Maannakkuugallartumik ilimagaarput COVID-19 peqqutigalugu pisut ukiup ingerlanerani pitsanngorumaartut, namminerlu inissisimanerput aamma sullitatta inissisimaneranut neriulluarpugut, aningaaseriviup pisortaata oqaatigaa.

GrønlandsBANKENip naatsorsuutigaa sullitat taarsigassaanut annaasaqarnerit, appartitsinerillu appasissasut aningaasallu nalinganik nalimmassaanerit annerusumik nikerarnavianngitsut.

Aningaaseriviup naatsorsuutigaa 2021-mi akileraarnissaq pitinnagu angusat kr. 115-135 mio. missaaniikkumaartut.