Taamaattumik kinaassutsimut uppernarsaat apeqqutigisarparput

Ullumikkut nalinginnaasuulluinnarpoq, kontomik pilersitsiniaruit, aningaasanik aggortitsiniaruit imaluunniit akiligassaq aningaasanik akilerniarukku kinaassutsimut uppernarsaammik takujumasarnerput. Aamma imaassinnaavoq aningaaserivimmi niuernivit siunertaa pillugu apeqquteqartugut.

Ilinnut sullitatut uumitsannarlunilu pasitsannartutut misiginarsinnaavoq. Tamatumunngali tunngaveqarpoq. BANKEN aningaasanik pinerlunnikkut pissarsianik malunnarunnaarsaanermi aamma peqqarniisaarniarnermut aningaasaliinermut akiuiniarnermi pingaarutilimmik inissisimavoq.

Sooq BANKEN taama amerlatigisunik apeqquteqarpa?

Aningaasanik pinerlunnikkut pissarsianik malunnarunnaarsaasarneq pillugu inatsimmi piumasaqaataavoq, BANKEN sullitaminut tamanut ilisimasaqarluassasoq. Tamanna aningaasaqarfimmik atornerluinermik pitsaaliueqataassaaq. Peqatigitillugu BANKEN qisuariarsinnaalissaaq, sullitamik nalinginnaanngitsumik iliuuseqartoqassappat. BANKEN pisussaatitaavoq oqartussaasunut nalunaaruteqassalluni, nuussineq aningaasanik pinerlunnikkut pissarsianik malunnarunnaarsaanernut imaluunniit peqqarniisaarniarnermut aningaasaliinermut atassuteqartoq pasitsattoqarpat.

BANKEN-ip suna ilisimassavaa?

Inatsisini allassimavoq, BANKEN-ip sullitani tamaasa ilisimassagai – tamatumunnga atuuppoq, kinaaneq apeqqutaanani, BANKEN-ilu sumut atornera apeqqutaanani. Tamatumunnga atatillugu BANKEN kinaassutsit misissussavaa, taamaattumillu nalinginnaasumik kinaassutsimut uppernarsaammik takujumassaaq. BANKEN-ip aamma aningaaserivimmi niuernivit siunertaa, aamma BANKEN-ip neqeroorutaanik qanoq annertutigisumik atuinissamut naatsorsuutitit ilisimassavai. BANKEN-ip nalornissutigilerpagu, paasissutissat naammattuunersut imaluunniit nutaajunersut, pisussaaffigaarput apereqqissalluta.

Kinaassutsimut uppernarsaat qanoq ittoq takutissavara?

Inatsisini toqqaannartumik allassimanngilaq, kinaassutsimut uppernarsaat qanoq ittoq takutinneqassanersoq. BANKEN-illi najugaqarnermut uppernarsaat, passit imaluunniit kørekorti takujumassavai, taakku kinaassutsimut uppernarsaatitut isumannaatsutut nalilerneqarmata. BANKEN-ip uppernarsarsinnaassavaa kinaassutsit misissorsimallugu, taamaattumillu kinaassutsimut uppernarsaatit takutissimasavit assingi toqqortaatigisussaavai.

BANKEN-ip uannut paasissutissat paarivai?

Soorunami BANKEN-ip paasissutissat ilinnut tunngasut paarilluarpai. BANKEN-imut aalajangiisuulluinnarpoq, illit sullitatut tatigissagit illit pillutit paasissutissat isertuussamik suliarineqartarnerat. Tassunga ilaavoq, inatsisitigut sukannersorujussuarmik piumasaqaataammat, BANKEN-ip sullitat inuttut paasissutissai paarilluassagai.