Aningaasat uninngatitat aamma taarsigassarsiarititat qaffakkiartuaartut kiisalu immikkoortuni arlalinni  pitsaasumik ineriartorfiusoqartoq, 2024-mi kvartalip siulliup takutippaa suli akileraaruteqarnani inernerusoq kr. 61,8 mio.-iusoq, ukiup siuliani piffissamut tassunga kr. 49,4 mio.-iusumut assersuullugu. Taamaasilluni pissutsit pitsaasut pitsaasunik sammisaqarneq aamma isertitaqarluarneq ingerlaqqipput.

Aningaaseriviup pisortaa Martin Kviesgaard 2024 pillugu mianersortumik neriulluarpoq, oqarlunilu: "Ukioq aallartipparput 2023 naaneratut, taarsigassarsiarititat qaffasissut aamma erniat qaffasissusaat tunngaviusumik ingerlatsinermik kivitsipput. 2022-mi aamma 2023-mi takusatsinnit ukiumut tamarmut sammisat appasinnerulaarnissaat naatsorsuutigaarput, ukiullu ingerlanerani erniat apparialaassasut aamma naatsorsuutigineqassaaq. Maannakkorpiarli naatsorsuutigaara tunngaviusumi isertitat qaffasinnerusumi inissisimassasut, aamma kvartali siulleq pitsaasorujussuarmik naavoq."

Taarsigassarsiarititat 2023-mi qaffasinnerpaamiimmatali kr. 79 mio.-inik qaffariarput maannakkullu kvartalip siulliup naanerani kr. 4.892 mio.-iullutik. Taarsigassarsiat taamaasillutik maannakkut ukiup ataatsip ingerlanerani 500 mio. koruuningajannik qaffariarsimapput. Peqatigitillugu kvartalimi siullermi qularnaveeqqutit kr. 23 mio.-inik qaffariarput kr. 1.797 mio.-inngorlutik, aningaasallu uninngatitat aatsaat taama amerlatigipput 6,7 mia.-iullutik. 2024-mi kvartalimi siullermi ilanngaateqareerluni ernianit aamma akiliutinit isertitat qaffariarneri, 2023-mi piffissamut tassunga sanilliullugu, 15,6 mio. kr.-iusunut, pingaarnertut pissutaavoq taarsigassarsiarititat qaffariarneri aamma erniat qaffasissusaata ineriartornera.

Peqatigitillugu aningaasartuutit annertunngitsumik qaffariarput aningaaserivimmilu pisortap itisilerpaa: "Aningaasartuutit qaffariarnerat isumaqatigiissutitigut iluarsiinermut, sulisut amerleriarnerannut aamma IT-mut ilinniarnermullu aningaasaliinernut attuumassuteqarpoq. Ataatsimut isigalugu aningaaserivik siunissamut qulakkeerinniffiginiarlugu kiisalu timitalimmik aamma digitalimik sullitat misigisaat pitsanngorsarniarlugit pingaarutilinnik alloriartarpugut."

Nalinik iluarsiinerit takutippaat 2024-mi kvartalip siulliup naanerani nalinit iluanaarutit kr. 5,4 mio.-iusut, taarsigassarsiarititanut aamma qularnaveeqqutinut nalikilliliinerit kr. 5,3 mio.-iupput. Postit taakku marluk 2023-mi kvartalimi siullermit appasinnerulaarput.

”Pitsaasuuvoq sullitatsinnut annertuumik annaasaqarnatalu nalikilliliinngitsugut, soorunami nikerartoqaraluartoq. Ukiut arlallit ingerlanerini nalikilliliinernut sillimmatinik ineriartortitsinikuuvugut, sullitat ataasiakkaat unammillernartunik nalaataqarnissaat inissaqartinniarlugit. Ataatsimulli isigallugu kusanartumik isikkoqarpoq. Maannakkorpiaq ukkataraarput qulakkiissallugu, aningaasaliinerit nutaat ass. sanaartornernut imaluunniit inuinnaat illunik pisinerinut ass. nukissiuutit akii qaffassappata aamma erniat qaffasinnerulissappata qajannaalluarnissaat.”

Aningaaseriviup pisortaa naggasiivoq: "Kvartali siulleq ajunngilluinnartumik ingerlavoq, inernerillu iluarisimaarpagut. 2024-p sinnera pitsaasutut isigaarput."

GrønlandsBANKEN-ip 2024-mi suli akileraaruteqarnani ukiumut inernerusussat kr. 180 – 230 mio.-iussasut naatsorsuutigalugit aalajangiusimavaa.

Kvartal siullermi naatsorsuut uani takuguk (qallunaatut allaqqavoq).