Kalaallit Nunaanni Ilisimatusarnermi Siunnersuisoqatigiit, Royal Greenland aamma Grønlandsbankenimi Inuussutissarsiornermut Aningaasaateqarfik ilisimatusarnermut 11,6 mio. koruunit aningaasaliissutigaat

Aningaasaliinermut isumaqatigiissut ilisimatusartut nutaat inuusunnerusullu atorfiannik piginnaasanillu ineriartortitsinerannik tapersersuissaaq. Aalajangersimanerusumik 2022-mi aningaasalerneqarput ph.d.-tut ilinniagaqarnermi tapiissutit sisamat kiisalu postdoc-itut ilinniagaqarnermi tapiissutit marluk, taakku ilinniagaqarnermi tapiissutit siunnersuisoqatigiit tunniussimasaat maannamut amerlanerpaajupput.

Ph.d.-tut ilinniagaqarnermi tapiissutit sisamat ukununnga tapiissutigineqarput:

• Ninni Olsen Jeremiassen, Kujataani Ivittuuni aatsitassarsiorfimmi eqqakkat aqerlup, zinkip flourillu arrorniarneri misissussavai. Ph.d.-liorneq Århus Universitetimi Kalaallit Nunaanni Pinngortitaleriffik suleqatigalugu ingerlanneqassaaq.
• Birthe Eriksen, inuusuttut inersimasullu atornerlugaasimasut ilinniarnermut atatillugu aaqqissuussani aqqusaagaat misissussavai. Ph.d.-liorneq Ilisimatusarfimmi ingerlanneqassaaq.
• Sanne Broberg, Kalaallit Nunaanni tarnikkut inoqqatigiinnikkullu unammillernartuusunik pitsaaliuineq, kalaallit kulturiannik aallaaveqartunik nutaanik eqqarsarnikkut periuseqarnikkut peqqissartinnerup ineriartorsinnaaneranut periarfissat misissussavai. Ph.d.-liorneq Ilisimatusarfimmi Roskilde Universitetimilu ingerlanneqassaaq.
• Natacha Leininger Severin, ”Jelly”-fiskit peqqutaannik qaleraliillu pitsaassusaasa appariartornerat, kiisalu qalerallit suliarinerisa aningaasarsiornikkullu iluaqutigineqarnissaasa pitsaanerulernissaannut teknologiikkut aallartisaatit misissussavai. Ph.d.-liorneq Københavns Universitetimi ingerlanneqassaaq Ilisimatusarfik, DTU Aqua, Kalaallit Nunaanni Pinngortitaleriffik aamma Royal Greenland suleqatigalugit.

Postdoc-itut ilinniagaqarnermi tapiissutit ukununnga tapiissutigineqarput:

• Daniel Estévez-Barcia, Kalaallit Nunaanni qalerallit qeqertat akornanniittut avataaniittullu sananeqaatsimigut (genetik) assigiinngissusaat misissussavai. Ilisimatusarneq Kalaallit Nunaanni Pinngortitaleriffimmi ingerlanneqassaaq, DTU Aqua suleqatigalugu.
• Ninna Karsbæk Senftleber, sananeqaatsitigut (genetisk) laktosemik sapigaqarneq misissussavaa, aammalu sooq kalaallit sukkumik sapigallit inunnut allanut naleqqiullugu inooriaatsimik peqquteqartumik nappaateqalinnginnerusartut misissussavai. Ilisimatusarneq aallartinneqareerpoq, Steno Inuunerissaavik Kalaallit Nunaanni ingerlanneqarluni.