2023-mi ukiup affaani siullermi GrønlandsBANKEN-imi akileraaruteqannginnermi inernerusuut kr. 103 mio.-it anguai, matumuunalu 2022-mi piffissami tassani inernerusut, 45,8 mio.-iusut marloriaataat sinnerlugit angusimallugit. Aningaaserivimmi pisortap, Martin Kviesgaard inernerusut iluarisimaarpai.

”Soorunami aningaaserivimmut nuannersuuvoq, ukiup affaa siulleq kisitsisinik taama kusanartigisunik angusaqarluta anigoripput, tamatumalu aamma takutippaa uninngasuutit aamma taarsigassarsiarititat aatsaat taama amerlatigimmata unammillersinnaassutsikkut inissisimalluartugut.”

Taarsigassarsiarititat annertuumik amerliartormerat, aningaasat nalinginut iluarsiissutit pitsaasumik inissisimanerat aamma aningaaseriviup Nationalbankenimut aningaasaliissutaanut erniat qaffasinnerusut inernerusunut pitsaasunut pissutaapput.

”Qaqutigoorpoq suut tamarmik maannakkutut eqqortumik ingerlasarnerat” Martin Kviesgaard oqarpoq

Aningaasat nalinginut iluarsiissutit nalikilliliinerillu sioqqullugit inernerusut iluarisimaarnertumik kr. 98,3 mio.-iupput, ukiup siuliani kr. 73,1 mio.-iusut. 2022-p naaneraniilli taarsigassarsiarititat kr. 285 mio.-inik qaffariarput, ukiullu affaata siulliup naanerani kr. 4.639 mio.-iullutik. 

”Inuussutissarsiornermi sullitattalu inuinnaat pitsaasumik ienriartorfiunerat pingaartumik illoqarfinni annerusuni takusinnaavarput. Tamanna 2022-mi kiisalu 2023-p affaani siullermi aningaaseriviup taarsigassarsiarititaasa aatsaat taama annertutiginerannik isumaqarpoq, soorunamilu aningaaserivimmut tamarmut sunniuteqarpoq” aningaaserivimmi pisortaq taama oqarpoq.

Aningaaseriviup nationalbankimi obligationiinut aamma aningaasaliissutaanut 2,5 mia.-iusunut erniat qaffasinnerunerata saniatigut taarsigassarsiarititat annertusinerat pingaarnertut pissutaapput. 2023-mi ukiup affaani siullermi ernianit aamma akiliutinit isertitat 2022-mut piffissamut tassunga sanilliullugit katillugit kr. 36,2 mio.-inik annertuseriarsimapput kr. 204 mio.-inngorlutik, akiliutinit isertitat 1,6 mio.-inik appariarsimagaluartut. 

Aningaaserivimmi sulisut amerlanerusut

Tassunga atatillugu aningaaserivik sulisunut amerlanerusunut kiisalu IT-mik ineriartortitsinermut aningaasaliivoq. 2023-mi sulisunut aningaasartuutit qaffariassapput, tamanna ilaatigut isumaqatigiissutitigut iluarsiinernik aammali sulisut amerlinerannik pissuteqarpoq. 

2023-mi ukiup affaata siulliup naanerani nalikilliliinerit ilanngullugit aningaasartuutit katillugit kr. 108,7 mio.-iupput, 2022-mi piffissami tassanik r. 97,8 mio.-iusut.

2023-mi ukiup affaata siulliup naanerani aningaasat nalinginut iluarsiissutit aningaaseriviup pappialanik nalilinnik paarisaanik, pingaarnertut obligationiusunit, aningaasat nalinginit kr. 11,0 mio.-inik iluanaarutiteqarneq takutippaat, piffissami tassani 2022-mi aningaasat nalinginit 25,2 mio.-inik annaasaqartoqarpoq.

Taarsigassarsiarititanit qularnaveeqqutinillu annaasat nalikilliliinerillu 2023-mi ukiup affaani siullermi kr. 6,3 mio.-iupput, 2022-mi ukiup affaani siullermi kr. 2,1 mio.-iusut.

”Aningaasat nalinginit iluanaarutit iluarisimaarnarput, ukiulli tamaasa taamaattoqartarnissaa naatsorsuutigisinnaanngilarput. Peqatigitillugu pitsaasuuvoq aningaaseriviup taarsigassarsiarititaani annaasaqaatit appasittorujussuunerat, aammali ilisimavarput piffissat aningaasaqarnikkut sanngiiffiunerusut takkussinnaasut” taamaattumik maannakorpiaq sullitat aamma aningaaseriviup inissisimalluarnerat pitsaasuuvoq.

Aningaaseriviup nalikilliliinerinut ataasiakkaanut ilassutitut suli kr. 38,2 mio.-it illuaqqaneqarput. Ilassutit pingaartumik aningaasat naleerukkiartornerinut, ernianut aamma aningaasaqarnermi pissutsini nalorninartunut attuumassuteqartunik aarlerinaatinik akiliissapput.

Aningaaseriviup ataatsimut niuernerata annettussusaa maanna 15 mia. koruunit missaanniippoq. 21. juli 2023-mi fondsbørsimut nalunaarummi akileraaruteqarnani ukiumi inernerusussatut naatsorsuutit kr. 145-185 mio.-init kr. 170-210 mio.-inut qaffanneqarput, taakkulu aalajangiusimaneqarlutik.