”Maannakkorpiaq misigisaleraluttuinnarparput sullitatta attavigisaraatigut, onlinekkut niuerfinnit, kryptovalutanik niuerfiusunit aningaasanik utertitsinissamut ajornartorsiuteqaraagamik” taama oqaluttuarpoq GrønlandsBANKEN-imi Aarlerinaatinik isumaginninnermut pisortaq Mads Reimer Andersen.

”Uatsinnut uparuassallugu pingaaruteqarpoq, kryptovalutanik niueruteqarneq tamarmi niuerfimmi aqunneqanngitsumi ingerlammat, tamanna uagut aningaaserivittut malittarisassat piumasaqaatillu sukannersut malitassatta, kiisalu Finanstilsynimit nakkutigineqartut illuatungerluinnaraa”.

Aningaaserivimmik aqutsinissamut malittarisassat piumasaqaatillu sukannersut kingunerisaannik, naalagaaffimmi aningaaseriviit tamarmik kryptovalutat pillugit siunnersuineq niueruteqarnerlu ingalassimasarpaat. ”Ass. Bitcoininik niuernermi pinerlunnikkut aningaasarsianik malunnarunnaarsaanermut kiisalu nukimmik atuinermut peqataanissamut aarlerinaat, aningaaserivittut tunaartarisassatut kissaatigisatsinnut ataqatigiinngilaq, illuatungerluinnaraluguli” Mads Reimer Andersen nangippoq.

Aningaaseriviit ”nakkutilliisuat” Finanstilsynet siusinnerusukkut kryptovalutanik aningaasaliinissamut ersarissummik mianersoqqussuteqartarnikuuvoq. Aningaasaliisarnerpassuit allat illuatungaannik, kryptovalutami aningaasaliinerup qanoq paasiuminaatsiginissaanut, erseqqinngitsiginissaanut aarlerinartiginissaanullu killiliisussanik inatsisinik peqanngilaq. Oqartussattaaq periarfissaqanngillat niuerfimmi sammisat nakkutigissallugit. Taamaattumik peqquserluttartut periarfissaqarluarput, aningaasaliisitsisartuusaassallutik, kiisalu atuisut ileqqaagaanik uupakaatillugit peqquserluffigissallugit. Tamanna soorunami inatsisinik unioqqutitsineruvoq, kisianni akiliiffigisimasat arlalitsigut tammareersimassapput, imaluunniit cyberspacemi toqqoqqalluassallutik.

”Ataatsimut isigalugu, sakkortuumik innersuussutigissavarput kryptovalutanik niuernermi kikkut tamarmik mianersorluinnarnissaat. Aningaasaatit aarlerinaatikinnerulluinnartummik aningaasaliissutiginissaannut periarfissarpassuaqarpoq, qujanartumillu piffissat negativimik erniaqarfiusut qaangernikuuagut, taamaattumik aningaasanik ataatsimut inissiinissaq qajannaannerusumik tunngaveqalernikuuvoq, tamannalu pillugu siunnersuerusuttorujussuuvugut” Mads Reimer Andersen naggasiivoq.