GrønlandsBANKEN-ip pinerlunnikkut aningaasarsianik malunnarunnaarsaaneq aamma peqqarniisaarniarnermut aningaasaliineq akiorniarlugit oqartussaasut suleqatigai.

Tamatumunnga tapeeqataasarpugut sullitatsitut ilinnik kiisalu aningaaseriviup aningaasaqarnikkut sullissinerinik aamma nioqqutitsinnik atuisarninnik ilisimannilluarnikkut.

Sullitatut aningaaseriviup ilinnik ilisimasaqarnissaanut piumasaqaatit pinerlunnikkut aningaasarsianik malunnarunnaarsaasarneq pillugu inatsimmi nassaarisinnaavatit. Pinerlunnikkut aningaasanik malunnarunnaarsaasarneq pillugu inatsimmi piumasaqaateqarpoq, aningaaseriviup sullitami kinaassusaa kiisalu sullitap sooq aningaaserivimmi kontoqarnera aammalu niuernermi attaveqarnerup annertussusissaa naatsorsuutaasoq ilisimassagaa. Pinerlunnikkut aningaasarsianik malunnarunnaarsaaneq pillugu inatsimmi aamma piumasaqaataavoq, aningaaseriviup sullitaq pillugu paasissutissaatiminik uppernarsaasinnaanissaa. Taamaattumik apeqquteqarfigisarpatsigit kinaassutsimullu uppernarsaammik takutitsinissat piumasarisarlugu.

Pingaaruteqarpoq sullitatsitut Kalaallillu Nunaanni innuttaasutut uagut niueqatiginissatsinnut toqqissisimassasutit. Aningaasaqarnikkut pinerluttarneq pinngitsoortinniarlugu pinerlunnikkut aningaasarsianik malunnarunnaarsaanermut aarlerinaat sapinngisamik annertunerpaamik annikillisarniarlugu aningaaserivik politikkeqarpoq. Peqatigitillugu aningaaseriviup politikkiani piumasaqaataavoq aningaaseriviup sullitani ilisimassagai tamannalu uppernarsarsinnaassagaa. Tamanna isumaqarpoq aningaaserivik sullitanik aamma suliffeqarfinnik niueqateqarnermi, nalilerutsigu, aningaaserivik aningaasaqarnikkut pinerlunnermut atornerlunneqarnissaanut aarlerinaateqarpat taamaatitsisarmat.

Taamaattumik maannakkut sullitagut ingerlaavartumik malittareqqiiffigisarnissaanut pisussaavugut. Taamaattumik aningaaserivimmi sullitatsitut piareersimassaatit sullinneqarnerit pillugu apeqqutinik akiortuisarnissamut. Tamanna pisinnaavoq aningaaserivik paasissutissanik nutaanik tigusaqarpat imaluunniit aningaaseriviup atornerani allannguuteqarpat.

Inuinnartut sullitatut apeqqutit arlaqartut akissavatit. Taamaasilluta ilinniassavatsigit kiisalu aningaaseriviup nioqqutai sullissinerilu qanoq atorusunneritit paasissallugu. Paasissutissat sullitatut pilersinneqannginnerni pissavagut inuinnartullu sullitanut atuuppoq – aamma meeqqanut:

• Ateq
• Inuup normua
• Najugaq aalajangersimasoq
• Kinaassutsimut uppernarsaat
• Aningaaserivimmi sullitatut siunertaq
• Annertunerusunik nuussinissaq sooq kissaatiginerit
• Aningaasat suminngaanneernersut aningaasallu sumut atorneqassanersut
• Illit imaluunniit qanigisavit arlaat pisortani qaffasissumik atorfeqarnersoq
• Aningaasanik ikisiguit imaluunniit pappilianik nalilinnik nuussiguit, pisussaatitaavugut aningaasat imaluunniit pigisat nalillit suminngaanneernersut
• Inuit aamma kontomut piginnaatitsissummik peqartut aningaaserivimmi sullitatuulli kinaassutsimik uppernarsaammik takutitsissapput.

Inuussutissarsiornermi sullitatut aamma paasissutissanik arlalinnik tunniussissaatit. Tamatumunnga pissutaavoq pinerlunnikkut aningaasarsianik malunnarunnaarsaaneq pillugu inatsit naapertorlugu sullitagut ilisimasussaagatsigit, kiisalu illit suliffeqarfivillu aningaaseriviup nioqqutai sullissinerilu qanoq atorniarneri ilisimasussaallutigit.

Inuussutissarsiornermi sullitat tulliuttut pillugit paasissutissanik tunniussissapput:

• Suliffeqarfiup aqqa
• Suliffeqarfiup adressea
• Suliffeqarfiup imaluunniit peqatigiiffiup cvr normua
• Piginnittoqarnermi pissutsit
• Kaaviiaartitassatut naatsorsuutigisat
• Aningaasatigut ikisinissat amerlassusaat naatsorsuutigisat
• Nunani tamalaani kortikkut nuussinerit amerlassusaat naatsorsuutigisat
• Nunanit allanit nuussinerit amerlassusaat naatsorsuutigisat
• Piginnittoqarnermi pissutsinut atatillugu, ilisimassavarput kiap imaluunniit kikkut, toqqaannartumik imaluunniit toqqaannanngitsumik suliffeqarfiup 25 %-ia sinnerlugu pigineraa
• Suliffeqarfiup aallartitai imaluunniit inuit suliffeqarfiup aningaasaatai pillugit aalajangiisinnaassuseqartut kinaassutsitik uppernarsassavaat kiisalu suliffeqarfimmit aallartitaallutik uppernarsaammik takutitsisassapput
• Peqatigiiffiit peqatigiiffiup ileqqoreqqusaanik kiisalu ataatsimiiersuarnermit kingullermit imaqarniliamik takutitsisassapput

Nipangiussisimasussaatitaavugut, paasissutissallu tigusagut tamaasa isertuussamik suliarisarpagut.

Aningaaseriviup sulisuni ingerlaavartumik pinerlunnikkut aningaasarsianik malunnarunnaarsaasarneq pillugu ilinniartittarpai, taamaasillutik sulisut paasissutissanik eqqortut kiisalu aningaasaqarnikkut pinerlunnermik paasinnissinnaassammata, paasissutissat aaneqartut aningaaseriviullu IT-kkut aaqqiissutai atorlugit. Tamatuma saniatigut aningaaseriviup ingerlaavartumik paasissutissat aaneqartut misissortarpaat. Aamma aningaaseriviup sulisuisa periarfissaraat aningaasaqarnikkut pinerlunneq eqqumaffigeqqussallugu. Tamanna aningaaseriviup whistleblowerimik aaqqiissutaa aqqutigalugu ilaatigut kinaassuseq isertuullugu iliuuseqarfigineqarsinnaavoq.

Aningaaserivik aningaaseriviit allat assigalugit pinerlunnikkut aningaasarsianik malunnarunnaarsaaneq pillugu suliassaqarfimmi tunngaviit malillugit sulisarpoq. Tunngaviit taakku pillugit Finans Danmark nittartagaani paasisaqarnerusinnaavutit. Tamatuma saniatigut aningaaserivik Finanstilsynimit nakkutigineqarpoq, taanna aamma pinerlunnikkut aningaasarsianik malunnarunnaarsaasarneq pillugu inatsimmik aningaaseriviit malinninnerannik ukkataqarpoq. Finanstilsynip aningaaserivinnut piumasaqaatit pillugit sullitat apeqqutaannut akissutit arlallit suliarai, Finanstilsynet nittartagaani paasisaqarnerugit.