GrønlandsBANKENip Inuussutissarsiornermut Aningaasaateqarfiata ullumi maajip 6-iani aningaasaate-qarfiup Pilesitsisunut akissarsiaritittagaa INUIT Quality Clothes of Greenland imut Hanne Kristiansenimit Dorthe Rødgaardimillu ingerlanneqartumut tunniuppaa.

Inussutissarsiornermut Aningaasaateqarfiup ukiuni kingullerni pilersitsisunut/aallartitsisunut akissarsiaritittagaq agguaattarpaa inunnut ataasiakkaanut imaluunniit suliffeqarfinnut, ingerlatsinerminni sulilluarsimasunut, tunniusimalluarsimasunut aammalu malunnaatilimmik takutitsisimasunut – ukiullu ingerlanerini Kalaallit Nunaanni ingerlatsisut assigiinngitsuneersut inuussutissarsiutinillu ingerlatallit siammasissumik assigiinngisitaartumillu aallaaveqartut akissartitinneqartarsimapput.

Inussutissarsiornermut Aningaasaateqarfiup siulersuisuisa ukioq manna akissarsisussatut toqqarsimavaat INUIT Quality Clothes of Greenland v/ Hanne Kristiansen aamma Dorthea Rødgaard.

Tunniunneqartoq 25.000 koruuninik aningaasartaqartinneqarpoq.

GrønlandsBANKENip Inussutissarsiornermut Aningaasaateqarfiani siulersuisuni siulittaasup Kristian Lennertip akissarsisitsineq imatut tunngavilersorpaa:

- Arnat nukittuut marluk 2015imi Inuussutissarsiornermut Aningaasaateqarfimminngaanniit akissarsisikkumavagut pikkorillutik, eqiasuillutik niuerniallaqqillutillu aallartitsisimammata Aasianni, Sisimiuni, Qaqortumi aammalu maanna Nuummi niuertarfimmi saniasigut atisaliaq maanna ilisarisimaneqarlualersimasoq INUIT Quality Clothes pilersillugu. INUIT Quality Clothes pilersikkamikku arnat pineqartut marluk taakku saqqummiussimavaat nioqqutissiaq immikkuullarilluartoq annertuumik Kalaallit Nunaannut attuumassuteqartoq. Ilisarnaat kalaallit anersaavannik nutaamillu takutitsinermik ataatsimoortitsisoq, kusanarluinnartumik erseqqaarissumillu nittarsaanneqartoq avammut naqitanngorlugu ussassarutigineqarnera imaluunniit qarasaasiaq atorlugu attaveqaatitigut takoqqusaarutigineqarnera apeqqutaatinnagu, Kristian Lennert oqarpoq.

Foto: Ulrik Bang/Bang.gl.