Sullitavut pillugit suut ilisimasariaqarpagut?

Malittarisassat malillugit sullitavut tamaasa ilisimasariaqarpagut – kinaanerit aningaaserivillu sumut atorniarnerit apeqqutaatinnagit. Taamaattumik kinaassutsivit misissornissaanut pisussaatitaavugut kinaassutsimullu allagartamik takujumassalluta.

Taakkua saniatigut aamma paasisariaqarparput sooq aningaaserivererusunneritsigut, qanorlu sullissinissatsinnik atuinissamut naatsorsuuteqarnersutit. Paasissutissat tigummisavut  tamakkiisuunersut nutartigaanersulluunniit arlaatigut nalornissutigigutsigit apereqqittarpugut.

Sumi innuttaassuseqarnerit paasissutissaatitsinni takusinnaanngikkutsigu aamma apeqqutigissavarput. Tamanna pingaaruteqarpoq Kalaallit Nunaata avataani akileraartussaatitaanersutit uppernarsarsinnaasariaqaratsigu.

Kinaassutsimut allagartat suut takutissavigit?

Kinaassutsimut uppernarsaatit apeqqutigigajutavut ukuupput:

• Massakkut najugarisannik uppernarsaatitut najugaqarnermut uppernarsaativit assilinera.
• Passinni atuuttumi quppernerup assitallip assilinera, aqqit, assit CPR-normullu ersittut.

Ukiorpassuarni aningaaserivitsinni sullitarisimagaluarutsigilluunniit paasissutissanik taakkuninnga piumassaagut, siornatigut tigoreersimanngikkutsigit imaluunnniit paasissutissat nutaanngilisimappata. MitID atorlugu netbankikkut iseriarlutit paasissutissat isumannaatsumik nassiussinnaavatit.

Suut akissuteqarfigissavigit?

Aningaaserivimmi sullitatut nutaajuguit immersugassamik immersueqquneqassaatit, tassanilu allassavat suna siunertaralugu uagutsinni sullitanngorusunnerlutit, ukiumilu nalinginnaasumi aningaaserivimmi sullissinerit qanoq atussamaarnerlugit.

Sullitat ilagereerpatsit ataavartumik nioqqutit suut atussamaarneritit, kontonnut ikisartussat qanoq amerlatigissangatinneritit aningaasallu nuunneqartartut nalinginnaasut apeqqutigisassavagut. Aammattaaq apeqqutigissavarput aningaasanik (kontantinik) ikisissamaarnersutit imaluunniit nunanut allanut aningaasanik nuussissamaarnersutit.

Aningaaserivimmi sullissinitsinnik atuinerit allanngungaatsiassappat qisuariarnissatsinnut pisussaatitaavugut. 

Paasissutissat ilinnut tunngasut ima illersortarpagut

Paasissutissat ilinnut tunngasut paarilluaqqissaartarpagut. Paasissutissat ilinnut tunngasut isertuullugit suliarisassagigut illit uagutsinnut tatiginninnerit pingaartipparput. Soorunami paasissutissat inunnut tunngasut illersorneqarnissaannik inatsisit sukannersut malippagut, taamaammat toqqissisimasinnaavutit. 

Paasissutissat ilinnut tunngasut qanoq suliarisarnerivut uani linkimi takusinnaavat: https://www.banken.gl/da/privat/priser-og-vilkar/behandling-af-persondata/

Uagut apeqqutiginavianngisagut

Kinaassutsinnut uppernarsaammik aningaasaqarninnulluunniit paasissutissanik piumasaraluarluta bankimit makkuninnga aperinngisaannassavatsigit – telefonikkut, mailikkut sms-ikkulluunniit. Ukuupput:

•      Paasissutissat akiliutinnut tunngasut
•      Isissutissatit nammineq pitit
•      MitID-imut isissutit

Sikkerdigital.dk-mi Digitaliseringsstyrelsen-imit aqunneqartumi ass. mailit, sms-it sianernerilluunniit aqqutigalugit peqquserlunnerit paasinissaannut siunnersuutit pitsaasut takusinnaavatit.