GrønlandsBANKENimi inuussutissarsiornermut immikkoortortaqarfitta ikiorsinnaavaatit pilersaarusiorninnik siunnersorlutit aamma taarsigassarsinissamut, qularnaveeqqusiornissamut allatullu aningaasalersuinissamut tunngasunik siunnersorlutit.

Kisiannili aningaaserivimmik ataatsimeeqateqarnissavit tungaanut nammineq qanoq iliorlutit pitsaanerpaamik piareersarsinnaavit, qanorlu oqaloqatiginninnissap ingerlanissaa takorloorpiuk?

Siullermik naapinnermi apeqqutit suut tamaviisa akisinnaasariqanngilatit, Namminerli suliffiuteqalernissaq takorloorukku, pingaartuuvoq ataani taaneqartut tallimat piareersimaffiginissaat:

1. Niuernissamut pilersaarutit
   

   Suut kikkunnut tuniniarnialersaarpigit? Niuerfik suna periarfissallu suut maluginiarsimavigit? 
   Iluatsitsittumik ingerlassagaanni pilersaaruteqartoqartariaqarpoq, taakkumi atorlugit pilersaarutinnut aningaasaleerusussinnaasut ujartutortussaassagakkit. Nalik.gl-imi immersugassiaq niuernermi pilersaarusiornissannut iluaqutaasinnaasoq ugguuna takusinnaavat.

2. Suliffeqarfiup qanoq ittuunissaa

   Ingerlanniakkat kisimiillutit ingerlatissaviuk, I/S-iliarissaviuk, ApS-iliarissaviuk imal A/S-iliarissaviuk? 
   Tamakku tamarmik ajunngequteqarput apeqqutaalluni suliffeqarfissavit qanoq ittuunissaanik kissaateqarnersutit. Suliffeqarfilialli tamarmik ataatsimoorfigaat CVR-normoqartussaagamik Kalaallit Nunaanni Suliffeqarfinnik Nalunaarsuisoqarfiup pigineqartussamik. 

3. Missingersuusiat isumaqatigiissusiornerillu
   

   Aningaasarsiorumagaanni siullermik aningaasartuuteqartariaqarpoq. Pilersitsisutut tamanna sukkasuumik malugissavat. GrønlandsBANKENilu aqqutigalugu aningaasalersuinissaq ingerlanniarukku, taava nalinginnaasumik missingersuusiortitsisariaqassaatit kukkunersiuisartumik ikiortilerlutit inatsisilerituullu atorlugit isumaqatigiissusiortitsisariqassallutit. Nammineq aallartinnissannut aningaasat piginngikkukkit, taava Namminersorlutik Oqartussat aqqutigalugit klippekort-imik piniarsinnaavutit siunnersortimut atugassannik. Namminersorlutik Oqartussat klippekortiat pillugu ataani saaffissaq atorlugu paasiniaasinnaavutit taavalu Nalik.gl aqqutigalugu qinnuteqarnissamut immersugassamik aallerlutit.

4. Akileraartarnissaq
   
   A-skat sunaana B-skat-imut sanilliullugu. Suullu killiutitaappat nalunaarutiginninnissamut akiliinissamullu? Namminersorlunimi suliffeqarfimmik aallarniiniaraanni maleruagassat killiliussallu nakkutigisassat pingaartut amerlapput. Qujanartumilli ikiorneqarnissamut ilitsersuunneqarnissamullu periarfissaqarpoq kukkunersiuisut ilinniarsimasut  aqqutigalugit aamma alakkartersinnaavat Akileraartarnermut Aqutsisoqarfiup nittartagaa. 

5. Nammineerluni aningaasalersuineq qularnaveeqqusiinerillu

   Aallartinnissamut pilersaarusiat imminnut akilersinnaasutut napatissinnaasutullu isikkoqarpat, aallartinissamut sipaaruteqarsimaguit namminerlu aallarniutissanik aningaasaliisinnaallutit, taava GrønlandsBANKEN aqqutigalugu taarsigassarsisinnaaneq kredit-itaarsinnaanerlu ajornannginnerussapput. Tamanna aamma atuuppoq soorlu assersuutigalugu nammineq inissiaatit, biilit angallatilluunniit aningaasanut sillimmasiussinnaagukkit imal. suleqatissarsisinnaaguit akiliisinnaassuseqarnermikkut isumassarsiannut tunuliaqutsiisinnaasunik. Nammineq aningaasalersuisinnaaneq sillimmasiisinnaanerlu aningaaserivimmit aaliangiisinnaanermut tunuliaqutsiissapput. Taamak aamma inissisimaneq takutitsimmat aalartitsinissamut piginnaaneqarlutillu piumassuseqartutit.