Attaveqarnermi siunnersorti Unnuarissat pisuttuaqatigisimavai, tusaruk qanoq ingerlasimanersoq:

"Tallimanngorneruvoq, inuit akissarsinikuupput aamma ilai akileraarutiminik utertornikuullutik. Inersimasunut tusarnaartitsisoqarpoq, meeqqanullu tivoli-qarluni. Unnuk manna Unnuarissat pisoqatigissavakka, Nuummilu toqqissisimatitseqataassallunga.

Mina, Heinrich aamma Keld pisoqatigissavakka. Mina ulluinnarni Mælkebøtten-imi sulisarpoq, Heinrich aamma Keld GrønlandsBANKEN-imi inuussutissarsiortunut siunnersortitut atorfeqarput.

Naatsorsuutigaarput unnuk manna meeqqat, inuusuttullu aneerrassasut. Danmark-imi Natteravnene akunnerit sisamat pisuttarput, aqqanerniit unnuakkut pingasut tungaanut, Nuummilu Unnuarissat akunnerit pingasut pisuttarput, qulingiluaniit, unnuap qeqqata tungaanut.

Illoqarfiup qeqqani pisulluta aallartippugut, tivoli sanioqqullugu, tivoli illoqarfimmiippoq sapaatip akunnerata missaani. Pisuffigineqallattaartuaannartumi aqqusineeqqami pisuppugut, inissiaqarfimmi Narsarsuarmi taasartagaanni. Minutsit arfineq marluk qaangiummata naapitaqarpugut. Angut imersimaartoq blok 8 eqqaani issialluni meeqqat pingasut-sisamat nipituumik oqaluuppai. Arnaq inersimasup arlaleriarluni meeqqat oqalooqqunnaaqqugaluarpai, angutilli soqutiginngilaa oqaluinnarlunilu. Sumiiffik uniffigivarput, oqaaseqarnatalu. Taamaalinerput tamanut avissaartitsivoq. Meeqqat aamma arnaq tamarmik allamut ingerlapput, angullu issiavimmi kisimiilerluni. Nipangerpoq. Uagut ingerlaqqippugut.

Mina oqarpoq Unnuarissat Nuussuarmukartuaannartut, taakanilu meeqqanik naapitaqartuaannarlutik Unnuarissanut nalunngisaqartunik. Taarsilaareerpoq, aqqusinermilu qullersuit qaammatitsinngikkunik takusaqarpiarsinnaanata. Nuussuarmi atuarfik anguarput, nuannappaluttullu tusaalerpagut, tarrallu tungitsinnut arpattut takusinnaallugit. Tassa meeqqat anguniaqqaarluta sukkaniuttut. Qungujunnartorujussuuvoq. Meeqqat aqqusinermut pimmata, qullersuup qaamaneranut takusinnaalerpagut, nukappissat arfiniliupput 12-illu missaanik ukioqarlutik. Arpannikuugamik anertikkarput, Unnuarissanullu tamarmik immikkut assaitik isaallugit sukkuaqqanik piumallutik. Qularnanngitsumik kavaajat sungaartut takullugit nuannaraat, uagullu aamma naapillugit nuannaraagut. Nukappissalli oqaasissaqarpallaanngillat, sukkuaqqamik pereeramik pinnguariartoqqipput.

Nuussuarmi Sangoriamut pisulluta aallarpugut. Inoqarpianngilaq, eqqarsaatigilereerparput illoqarfiup qeqqanut utissanerluta. Arnaq utoqqasaaq pitsorluttoq ajaappialik takuaatigut ikioqqullunilu. Minap taliminik eqisimaalugu pisoqatigaa, puussiaataalu paaralugu. Mina arnallu tunuani malinnaavugut, bussit unittarfiata tungaanut qanipparput, busserluni angerlarniassammat. Illoqarfimmi tivoli qamissimavoq, matusimagami. Narsarsuarmi meeqqanik aneertoqanngilaq. Arnaq pisiniarfimmiit sivisuumik ammasartumiit anivoq, pisiaminik paaraluni. Kavaajat takuai, nersualaarlutalu: ”Kusanartusi”, Heinrich, Keld-ilu sappakka. Oqarfigaakka qallunaatut nutserlugu arnap kusagisimagaatigut. Keld Heinrich-imut saappoq oqarlunilu: ”Aap, kisiat illit pinngilaatit”, illarpugut. ”Tamatta paarivatsigut” arnaq oqarpoq. Unnuk manna pisunnitsinni aatsaavissuaq nersualaartinngilagut.

Nalunaaqutaq unnuaqeqqalerpoq. Kavaajagut utertippagut, Mina-lu atuagaaqqamut nalunaarsivimmut allalluni unnuk qanoq ingerlasimanersoq. Kingorna politiinut sianerpoq nalunaarlunilu unnuk eqqissisimasuusimasoq, pisunnerpullu maannakkut naammassigipput. Oqaatigaa politiit Unnuarissat pisuttarnerat iluarigaat, Unnuarissanngooq pisukkaangamik eqqissisimanartarami. Nammineq kavaajagut atorlugit silamut anigatta kinaassuseeruseqqippugut. Silaannarittumi pisunnikuugatta ingerlaannaq sinilerpunga."

Meeqqat inuusuttullu aneertartut ikinnerupput
Niels Nielsen ukiut 19-nit qaangiummata Unnuarissat aallartinneqarneri peqataaffigivaa.
- Meeqqat inuusuttullu ullumi annertartut ikinnerupput ukiut qulit matuma siornamut sanilliullugu, tamanna aamma Danmarkimi nalinginnaalersimavoq. Spil-eqarnera aamma digital-ikkut attaveqarneq periarfissaammat ilimagaarput meeqqat inuusuttullu siornatigutuulli aneerpallaannginnerat tamakku peqqutaasut. Kammalaatit aqqusinermi naapinnissaanut pisariaqartitaq allanngorsimassaaq, digital-ikkut periarfissat nutaat allat ammarmata, Niels oqarpoq.

Unnuarissat – qanoq sunniuteqartaramik?
Unnuarissat aqqusinermi ersarinnerat toqqissisimatitseqataasarpoq. Oqaloqatigiinnissamut aallartitsisinaapput, meeqqat inuusuttullu oqaloqateqarnissaminut piumagunik Unnuarissat tusarnaarsinnaallutik.
Nuummi Unnuarissat 2000-imi pilersinneqarnikuupput.
Unnuarissat Nuummiittut Facebook-ikkut malinnaaffigisinnaavatit: Nuuk-Natteravnene
Nuummi Unnuarissatut pisuttarusuppit immaqaluunniit suliaat pillugu annerusumik tusagaqaruppit? Taava siulersuisuat Niels Nielsen attavigisinnaavat uunga nuuk@natteravnene.dk imaluunniit nn@banken.gl
GrønlandsBANKEN Nuummi Unnuarissat suliaat tapersersorpaat, aningaaserivimmi inuiaqatigiinnut akisussaaffeqarneq (CSR) naapertorlugu.