21.marts 2019 nal.16.30-mit eqqumiitsuliortoq imminut ilinniartissimasoq Camilla Nymand Petersen siullerpaamik saqqummersitaminik GrønlandsBANKEN-imi ammaassaaq. Camillap eqqumiitsuliai pingaartumik immami uumassusermut, imarmiunut avatangiisimut – takorluukkanik kiisalu oqaluttuanik oqaluttuatoqqanillu akullugit tunngapput.

Saqqummersitaminik ammaanissaminut Camilla ima oqaaseqarpoq:
- Kalaallit Nunaanni nerisatta annertunerpaartaat toqqaannartumik pinngortitameersuupput, pingaartumik imarmiut nerisatsinni pingaaruteqarluinnartuupput. Innuttaasut 10 %-iinnai piniarnermik aalisarnermillu inuussuteqaraluartut, nunap avammut niuernerata 90 %-ia aalisarnermi nioqqutissanik niuerneruvoq. Nunatsinni imaq immikkut pingaaruteqarlunilu inissisimavoq”.

Eqqumiitsuliat oqariartuuteqartut
Eqqumiitsuliai takussutissaannaanngillat, saqqummersitsinerami itinerusumik isumaqarpoq erseqqissumillu oqariartuuteqarfiulluni. Tamanna pinngortitaq pillugu pissutsitsinnut tunngavoq:

- 2050-imi immami plastikkit eqqakkat aalisakkanit amerlanerussapput, maanna tamatuma allanngortinnissaanut iliuuseqanngikkutta.
Nunaarannguugaluarluta amerlanngitsunik innuttaasulik, plastikkinik eqqakkanillu pisariaqanngitsumik pinngortitamut eqqaasarneq siuttuulluta akiuiniarnissatsinnut periarfissaqarluarpugut. Saqqummersitsininnik – pingaartumillu qalipakkamik ataatsimik – tamanna pillugu soqutiginnilersitserusuppunga. Pinngortitamik inuussuteqartuuvugut, pinngortitami uumasunik inuussuteqartut. Pinngortitaq ataqqisariaqarparput, Camilla naqissusiivoq.

Eqqumiitsuliortoq kinaana?
Camilla 38-nik ukioqarpoq nuummiuullunilu. Imminut ilinniartissimavoq, taamaattumillu eqqumiitsuliornerup silarsuaani ilinniagaqarsimasuunani. Soqutigisani kajumissutsinilu naapertorlugit qalipaasarpoq. Pingaartumik akrylimik qalipaasarpoq kiisalu uumasunik, pinngortitamik, oqaluttualianik avatangiisimillu soqutigisaqarnini akulerullugit misileraakkajuttarluni.

Paasissutissat
Camillap qalipagai GrønlandsBANKEN-imi 20. maj 2019-ip tungaanut saqqummersinneqassapput.
Qalipakkat ilai tuniniarneqassapput.