Sermitsiap nutaarsiassaataani atuarneqarsinnaavoq GrønlandsBANKEN umiatsiaararsortunut aningaasaliinermut, atortunillu taarsiinermut aningaasanik atuineq unitsikkaa. Aningaaserivik ukiut arlalinni aningaasaliinermut tunuarsimavoq, aningaaseriviillu aaliangiinera maanna pivoq. Aningaaserivimmi pisortaq Martin Kviesgaard oqarpoq:

”Pisassiissutit piffissami sivitsortumi annertuallaarujussuareersut aamma allanngorteqqinneqarput, taamatullu inuussutissarsiornermi aalisartut amerlavallaalersimallutik. Tamanna piujuaannartitsinissamut aningaasaqarnermullu innarliisinnaavoq. Taamaattumik nutaamik pitaalernermi atortunilluunniit taarsiilernermi aningaasaliisinnaanerit tamaasa unitsippagut. Tamanna uggornarpoq, ukiorpassuarnimi atuisugut pitsaalluinnarsimapput, taamatulli ingerlaannassagutta tamanna Kalaallit Nunaata aningaasaqarneranut isigineqarneranullu innarliisinnaavoq ulorianarluinnarlunilu. Kalaallit Nunaanni piujuaannartitsinissamik siunertaqarluta ingerlanissarput naatsorsuutigineqarpoq, tamannalu eqqarsaatigalugu maanna iliuuseqarpugut.”

Aningaaserivik ukiuni arlalinni piujuaannartitsinermik tunngaveqanngitsumik aalisarneq mianersoqqussutigisarpaa, ilaatigut aningaaseriviup ukiumut nalunaarutaani kingullerni pingasuni.

”Pisassiissutit qaffaavigineqaqqittut takoqqammerpagut, naak aalisakkat minneruleriartortut, aalisartullu amerlingaluttuinnartut. Aalisartut – pingaartumik umiatsiaararsorlutik aalisartut – ukiuni kingullerni 50 procentimik amerleriarsimapput, pisassiissutillu biologit innersuussutaat qaangerlugit, ilaatigullu pisarineqarsinnaasut allaat sinnerlugit, qaffanneqartarput, tunngavilersuivoq, nangillunilu aalisakkat aalisartunit taama amerlatigisunit inuussutissarsiutigineqarnissaat naammagunaarsimasoq” aningaaserivimmi pisortaq Martin Kviesgaard oqarpoq.

Akisussaasumik aningaasanik siunnersuinissaq siunertaralugu
Martin Kviesgaard nassuerutigaa aningaaseriviup aaliangiinera aalisartunut ilaannut allanik suliffissarsiornissartik kinguneqarsinnaasoq.

”Ajuusaarutigaarput atuisugut aningaasanik atukkersinnaajunnaarlugit ilisimatittariaqaratsigit – pitsaanerpaamik sullitagut siunnersornissai tunngavigaarput. Umiatsiaaqqamik nutaamik imaluunniit motoorimik nutaamik pitaarniarluni aningaasaliineq aalisarnerup ineriartorneranut atajunnaavissimavoq. Siornatigut oqareernikuuvugut aalisarnerup iluani milliuunilikkaanik 100-nik aningaasaliinerusinnaalluta, taamaattoqassappalli piujuaannartitsinissaq tunngavigalugu aalisarneq aqunneqartariaqarpoq. Aqutsineq ullumikkutut itsillugu aningaasaliisarnerput ingerlatiinnassagutsigu, taava aalisartut mianerinagit immineersimaannarsimassavagut. Taama ingerlaannassagutta aningaasaqarniarnermi siunnersuinerput kukkunerullunilu ajorluinnassaaq” Sermitsiamut oqaaseqarpoq.

Ukiumut nalunaarutit uani takukkit

Apeqqutissaqaruit attavissaq:
Tusagassiinermik akisussaasoq
Melissa Krogsgaard
mk@banken.gl
Oqarasuaat 34 78 79