Aningaaseriviup 2021-mi kvartalimi siullermi akileraaruteqannginnermi kr. 40,2 mio.-it anguai, 2020-mi kr. 16 mio.-inut, Covid-19-ip nunarsuaq tamakkerlugu tuniluunneranik sakkortuumik sunnertisimaffiusumut sanilliullugu. Tunngaviusumik ingerlatsineq allanngunngingajassimavoq kr. 38 mio.-iulluni, 2020-mut atatillugu pingaarnertut aningaasat nalinginik iluarsiinerit kr. 3,1 mio.-iusut aamma kr. 0,9 mio.-inik nalikilliliinerit annikitsut angusanik qaffatsitsipput.

GrønlandsBANKEN 2020-mi kvartalimi siullermut sanilliullugu aningaasanik amerlanerusunik taarsigassarsiivoq, taarsigassarsiat ukioq manna kvartalimi siullermi aamma appalaaraluartut. Maannakkut taarsigassarsiarititat 3,905 mia. koruuniupput, qularnaveeqqutillu 1,8 mia. koruuniusut katillugit aningaaseriviup oqaluttuarisaanerani aatsaat taama maannamut qaffasitsigipput. Tamanna ukioq kingulleq isertitani kr. 82,9 mio.-iusuni ukioq manna kvartalimi siullermi kr. 86,1 mio.-inut qaffariarnermut tunngavissiivoq.

- Takusinnaavarput, suliffeqarfippassuit inuppassuillu aningaasaqarnerat nukittusoq sulilu aningaasaliisartut. Tamanna pitsaasuuvoq, nunarsuaq tamakkerlugu tuniluunnerup nunarpassuit sakkortuumik eqqornikuugai eqqarsaatigissagaanni. Soorunami iluarisimaarparput unammillernikkut pitsaalluinnartumik inissisimagatta.

Aningaaserivimmi pisortap erseqqissaatigaa, sinaakkutissanik pitsaasunik pilersitsisoqarpat, inuiaqatigiinni pitsaasumik ineriartortitsinissamut periarfissaqarpoq.

- Soorunami aalajangiisuussaaq kommunit Naalakkersuisullu nutaat inuussutissarsiornermut pilerinartunik tatiginartunillu sinaakkutinik ukkataqarnissaat. Maannakkut nunarsuarmi tuniluunnerup qaangiunnissaanut nukittuumik piujuartitsisumillu inuussutissarsiornermi ineriartortitsinermik pilersitsisoqassaaq.

IT-mut aamma sulisunut aningaasaliineq
Naatsorsuutini aningaasartuutit aamma qaffariarnermik takutitsipput. Matumani pingaartumik sulisunut amerlanerusunut aningaasartuutit aamma IT-mut kiisalu malittarisassanik malinninnermut aningaasartuutit qaffatsitsipput.

- IT-mut kiisalu pingaartumik malittarisassanik malinninnermik suliaqarfimmut aningaasartuutit qaffakkiartortut takusinnaavagut. Tamatuma saniatigut sulisut nutaat aningaasaliiiffigaagut, Kalaallit Nunaanni siunnersuinitsinnik pisariaqartitsisut amerliartuaarnerat ilutigalugu.

Nalikilliliinerit annikitsut
Grønlandsbankenip taarsigassarsianut annaasaqaatai nalikilliliinerilu 2020-mi kvartalimi siullermi Covid-19-imik sakkortuumik sunnerneqartumi kr. 9,2 mio.-init kr. 0,9 mio.-iinnarnut appariarput.

- Nalikilliliisarneq appasippoq isumaqarpugullu nunarsuaq tamakkerlugu tuniluuttoqarneranut atatillugu aarlerinaatit annertunerpaat isumagineqareersut, soorunami sivitsornissaanut imaluunniit ajorseriaqqinnissaanut aarlerinaateqaraluartoq.

- Pingaartumik suliffeqarfiit takornarialerisut kiisalu akunnittarfiit siunissamik qaamasumik pisariaqartitsipput. Neriuppunga, piaartumik piviusorsiortumik periarfissanik eqqarsartoqassasoq, ass. nunamut corona-pas-ilinnik tikeraaqarsinnaanermut atatillugu. Inuussutissarsiutip tamanna pisariaqartippaa, qulakkiissagutsigu, aningaasaqarnikkut aamma annertussutsikkut ajorpallaanngitsumik tunngaveqassappata, takornariaqarneq inuussutissarsiornermilu angalanerit aallartisalerpata, Martin Kviesgaard oqarpoq.

Ineriartornissamut inissaqartitsineq
Aningaasaatit procentiat 22,3%-iuvoq, taamaasillunilu akiliisinnaanermut pisariaqartinneqartunut naatsorsorneqartunut 10,8%-iusunut atatillugu ilorrisimaarnartuulluni.

- Nalilerparput,Kalaallit Nunaanni aningaaserivimmik qajannaatsumik peqarnissaq pingaaruteqartoq, kiisalu suli ineriartoqqinnissamut inisssaqartoqassasoq, Martin Kviesgaard oqarpoq.

Nunarsuaq tamakkerlugu tuniluunnerup ineriartornerata suli nalornissutigineqarnera tunngavigalugu GrønlandsBANKEN-ip 2021-mut tamarmut naatsorsuutigisani attatiinnarpai, akileraaruteqareernani kr. 115-135 mio.-inik angusaqassasoq naatsorsuutigineqarluni, 2020-mi 130,9 mio.-inut sanilliullugu.