Corona pillugit pisut peqqutigalugit, siulersuisunilu ataatsimeersuaarneq immikkut ittoq ingerlareernerata kingorna aningaaserivik aaliangerpoq piginnittunut iluanaarutit ataatsimeersuaarnermi tunniunneqartussaagaluit taamaatiinnarniarlugit. 2019-imiit iluanaarutit tunniunneqartussaagaluit katillugit kr. 54 mio.-pput. Tamanna aningaaseriviup fondsbørs-ikkut nalunaarutigivaat.

- Aningaaserivik qajannaatsumik nammineq aningaasaqarpoq, taamallu iliorluta aningaasaqarneq annertusinerussavarput. Nunatsinni suliffeqarfiit nalunartoqartinnerani aningaasatigut annerpaamik ikiorsinnaanissai pingaartipparput, aningaaserivimmi pisortaq Martin Kviesgaard oqarpoq.

- GrønlandsBANKEN-ip nammineq aningaasaqarnera maanna kr. 1,08 mia.-it missaaniilissapput. Aningaasanik atukkiinissatsinnut inissisimalluarnerulerpugut aammattaaq aningaasanik naatsorsuutigisinnaasatsinnik annaasaqarsinnaanissatsinnik piareersimaffigilluaqqassallugu, Martin Kviesgaard oqarpoq.

- Akerliatigullu ajuusaarutigaarput piginnittut iluanaarutissaraluatik tigussannginnamikkit, neriuppugulli paasissagaat taamak aaliangiisimasugut aningaaserivik sullitaminut, inuiaqatigiinnullu tapersersuiniarluni taamak iliortoq. Piginnittuniilli annerpaanit tapersersorneqarnerput tusareerparput, Martin Kviesgaard oqarpoq.

GrønlandsBANKEN fondbørs-ikkut aamma nalunaarutigivaa aningaaserivik ukiumut nalunaarusiorfimmut nalorninartoqartillugu, ukiumullu naatsorsuutigisat kr. 80-130 mio. missaanut inissillugit, siornatigut ukiumut naatsorsuutigisat kr. 120-140 mio. missaaniinnikuullutik.

Corona-virus pillugit pisut pitsanngoluassagaluarpata aningaaseriviup siulersuisui ukiup ingerlanerani ataatsimeersuaarneq immikkut ittoq ingerlannissaa pisinnaatitaaffigivaa, iluanaarutillu piginnittunut tunniussinnaallugit.