GrønlandsBANKEN qaammatit qulingiluani siullerni akileraarutit ilanngaatiginagit kr. 115,9 mio. angusaqarpoq, 2018-imi kr. 106,9 mio.-inut sanilliullugit, appartitsinerillu annikittut aamma nalinik iluanaarutitalinnik nalimmassaanerit iluaqutaanikuullutik. Nalinik nalimmassaanerit aamma appartitsinerit akileraarnissaq pitinnagu kr. 112,7 mio.-pput ukiorlu ataaseq sioqqullugu kr. 115,5 mio.-llutik.

2019-imi qaammatit qulingiluani siullerni, 2018-imituulli, aningaaserivimmi taarsigassaqartitsineq ikilipput, aningaaserivimmili ukioq manna qaammatini qulingiuluni siullerni taarsigassaqartitsinerit kr. 221 mio.-inik amerlipput, aningaaserivimmullu taarsigassaqartitsinerit katillugit kr. 3.694 mio.-pput septembarip naalernerata nalaani. Tamanna qaammatini qulingiluani 6,3% -inik qaffassimavoq. Tamanna aningaaseriviup pisortaata Martin Kviesgaard iluarusimaarutigivaa.

- Ukioq manna qaffariarneq ataatsimut isigalugu iluarusimaarnarpoq aamma uppernarsarpaa nunatsinni suliniuteqarluartoq. Kalaallit Nunaanni qajannaatsumik ineriartortoqarnissaa tapersersorluassavarput, aningaaserivimmi pisortap Martin Kviesgaard oqaatigaa.

Aningaasat aningaaserivimmiitsitat 2019-imi qaammatit qulingiluat siullerni amerlisimapput, naatsorsuutigineqarporlu ukiup sinnerani appariartuaassasut. Inuiaqatigiit aamma aningaaseriviup sullitai annertuunik aningaasaliissamaarput, tamannalu siunissami qanittumi aningaaserivimmi aningaasat uninngatitanut nikerartitsisinnaavoq.

Tunngaviusumik isertitat pitsanngorput

Qaammatit pingasut kingulliit kisimi takussagaanni tunngaviusumik isertitat pitsanngorsimapput, isertitat amerlisimapput, ataatsimullu akileraarutit ukiumut sinneranut sanilliullugit annikinnerullutik.

- Qaammatit kingullerni pingasuni isertitat annertusipput, pisarnermiillu akileraarutit annikinnerullutik, taamaammat tunngaviusumik isertitagut qaammatini pingasukkaartuni naatsorsuusinermi aatsaat taama pitsaatigipput. Aningaasanik atortitsinerit taamak amerlatigineri aamma qularnaveeqqutit annerusumik peqqutigivai. Tunngaviusumik ingerlatsineq erngianik iluanaarutissartaqanngitsunik aamma malittarisassat sukaterneqarneri peqqutigalugit aningaasartuutit amerligaluartut tamanna ajunngilluinnarpoq, Martin Kviesgaard oqaaseqarpoq.

Pappiliat aningaasanik nalingi nalimmassarneqarneri qaammatini qulingiluani siullerni kr. 9,8 mio.-nik iluanaarutissartaqarput, 2018-milu piffissami tassani kr. 0,5 mio.-llutik. Qaammatit pingasut kingullerni nalinik nalimmassaanermi iluanaarutissat peqqutigivaat aningaaseriviup Sparinvest Holding-imi piginneqataanini Nykredit-imut tunigamigit tamannalu kr. 8,6 mio.-nik iluanaaruteqarsimalluni. Aningaasanillu atortitsinermi appartitsinerit ikilipput, qaammatinili qulingiluani kr. 6,6 mio.-nik amerlatigipput ukiorlu ataaseq sioqqullugu kr. 9,1 mio.-llutik.

Erngiat iluanaarutissartaqanngitsut

GrønlandsBANKEN ataavartumik Nationalbank-imut erngianik iluanaarutissartaqanngitsunik akiliisarpoq, niuernermilu aamma aningaasat aningaaserivimmiitsitat amerlinerani unammillernanngitsuulluni.

- Aningaasat aningaaserivimmiitsitanut annertuunut taamaallaat erngiaqartitsivugut iluanaarutissaqanngitsunik, kisiat novemberip aallaqqaataaniit inuussutissarsiortunut erngiat iluanaarutissartaqanngitsut annerusumik atuutilertissavagut, tamannalu aaqqeeqataajumaarpoq. Inuinnarnut sullitatsinnut suli iliuuseqanngilagut, kisianni aningaasanik aningaaserivimmiitsitaqarnermi ineriartorneq malinnaaffigaarput, Martin Kviesgaard oqarpoq.

Aningaasaatit procentii 22,3%-iupput tamannalu akiliisinnaanissamut pisariaqartitsineq 11,2%-iusoq iluarisimaarnartumik qaangerlugu inissisimaluni.

Ukiup sinneranut aningaaserivik naatsorsuutigisani maannakkut qaffappai kr. 135-155 mio.-nik akileraannginnermi inerneqassalluni, kingusinnerpaamik naatsorsuutigalugu nalunaarutiginikuugaluarpaat kr. 130-150 mio.-nik inerneqassallutik. 2018-imi kr. 140 mio.-nik akileraannginnermini inerneqarpoq.