Inussutissarsiornermut aningaasaateqarfik ukiualunngortuni aallarniisumut nersornaasiuttakkani inummut suliffeqarfimmulluunniit, ingerlatsinermini suleriarsinnaassutsimik, tunniusimanermik immikkuullarissumillu aallartitsisinaanermik takutitsisimasumut tunniuttarpaa – ukiullu ingerlanerini nersornaasiissut Kalaallit Nunaanni sumiifinni assigiinngitsuni assigiingitsunillu ingerlataqartunut tunniunneqartarsimavoq.

Inuussutissarsiornermullu aningaasaateqarfimmi siulersuisut 2018-imi nersornaasiissutissaq, Qooqqut v/Mads Bek-imut tunniunneqassasoq aaliangersimavaat. 

Nersornaasiissut kr. 25.000-inik aningaasartaqarpoq.

GrønlandsBANKENip Inuussutissarsiornermut aningaasaateqarfiani siulittaasup, Kristian Lennert-ip, nersornasiissut imaattunik oqaasertalerlugu tunniuppaa:

” Mads Bek Inuussutissarsiornermut aningaasaateqarfimmit 2018-imi aallarniissumut nersornaasiissutaanik tunineqarpoq, aallarniisutut piumassuseqarluarluni eqiasuillunilu  ukiuni kingullerni, Nuup Kangerluani Nuummit 50 kilometerinik ungasitsigisumi,  neriniartarfimmik pilersitsilluni ingerlatsilersimanini pillugu. Pilersissimavaami ingerlanneqartoq nuannarineqarluartoq pitsaanerpaamillu sullissaminut misigisaqartitsisarfiusoq.

Qooqqut Nuan tunngavigalugu Mads Bek sumiiffiusumi periarfissanik ineriartortitsisimavoq imaatigut angalasunit takornarianillu ornikkumaneqarluartumik. Ingerlanneqartorlu ineriartortinneqarsimavoq, aningaasaqarnikkut patajalliartoneq ilutigalugu. Tassanilu misigisassat tamatigoorlutillu siammasissut neqeroorutigineqarput nerisassiat kusanartuliat akuleriaakkallu aallaavigalugit, soorlu aamma neqeroorutigineqarlutik tikeraartut imminneq pisaannik nerisassiuussineq aammalu illuaqqiani unnuinerit.  

Taamatut immikkuullarissuseqartumik tunngaveqartumik ingerlatsineq, ”silap qanoq issusia naalagaralugu”, soorlu innaallagiaqartitsilluni, imeqartitsilluni, tulaffissaqartitsilluni kisarfissaqartitsillunilu, immikkuullarilluinnartumik piginnaaneqarnissamik pisariaqartitstsivoq. GrønlandsBANKENillu Inuussutissarsiornermut Aningaasaateqarfianit isumaqarpugut takutinneqartut, suliamut tuniusimaneq qasujaassuserlu, Mads Bek-ip Qooqqut Nuan-imi piginnaneqarfigalugit takutikkai.”  

Annertunerusumik paasiniaasoqarsinnaavoq saaffigalugu: Siulersuisuni siulittaasoq Kristian Lennert, mobil 55 83 84.