Danmarkip kunngeqarfiani aningaaserivit 67-it aningaaserivittut isumannaassusaasa nalilersorneranni GrønlandsBANKENi suli isumannaannerpaat pingajuattut inissisimavoq. Bank Researchip misissuinerani nutaami, 4 maj Børsenimi saqqummersinneqartumi, tamanna takuneqarsinnaavoq.

Tassanimi isumannaassutsimut misissuinermi pointit ilaannik 275-inik GrønlandsBANKENi pissarsisinneqarsimavoq, ikinnerpaanillu pissarsisoq isumannaannerpaatut naatsorsuutigineqartarpoq. Misissuinermi GrønlandBANKENi taamaallaat Borgbjerg Sparekasse-mit aamma Klim Sparekasse-mit ammut qaangerneqarsimavoq, taakku 247,7 aamma 250 pointinik pissarsisimammata.

Allattorsimaffiit pingaarnersaat

Bank Researchip misissuisarnera immikkut ilisimasalinnit taaneqartarput ”aningaaserivinnut pingaarnerpaaq”. Siorna isumannaassuseq pillugu misissuisimanerup avammut nalunaarutigineqarnerani Business.dk-ip aningaasarsiornermut aaqqissuisuata Peter Nyholm-ip aningaaserivinnik atuisartut aamma aningaasaliisartut allattorsimaffik sumut atorsinnaaneraat pillugu ima oqaatigaa:

- Atuisartutut inuinnaasutut imaluunniit suliffeqarfiuteqartutut allattorsimaffiup misissuataarnissaa pingaaruteqartorujussuuvoq, taanna atorlugu isummersortoqarsinnaammat aningaasanik niueqatigiittarnermi aningaaserivimmut isumannaannerpaamut sorlermut aningaasaatit inissinneqarpata pitsaanerpaassanersoq, Peter Nyholm oqaluttuarpoq, nangillunilu:

- Ingerlaannartumik takuneqarsinnaasarpoq bankip aningaaserivittut qanoq patajaatsigisumik inissisimanera, taamaalilluni allattorsimaffik misissuinissamut sakkussatsialaavoq. Aningaaseriviup isumannaatsuunera imaluunniit annikinnerusumik isumannaatsuunera ilisimassallugu pitsaasuuvoq. Siunissaq isigalugu nammineq aningaasaatit qularnaatsumik inissinnissaannut aamma aktianik pisiniarnissami isumannaallisaataasarpoq, Peter Nyholm nalilersuivoq.

Aningaaserivik patajaatsoq

GrønlandsBANKENip pisortaa Martin Kviesgaard ukiumoortumik misissuinermut ima oqaaseqarpoq:

– Sorunami ajunngilluinnarpoq misissuinermi ukioq mannattaaq ajunnginnernut akuugatta, uatsinnulli pingaaruteqarpallaanngilaq nr. 3-tut, 10-tut 20-tulluunniit inissisimassagutta. Pingaaruteqartoq tassaavoq Kalaallit Nunaanni atuisartuvut aningaasaliinialeraangata taarsigassarsinialeraagataluunniit uagut aningaaserivittut patajaatsutut peqataasinnaassuserput, Martin Kviesgaard oqarpoq.

Bank Research-ip misissueqqissaartarnerini paasissutissat immikkuullarissut 21-it toqqammavigineqartarput, assersuutigalugit aningaasaatinik amerliartortitsisinnaassuseq, akiliisinnaassuseqarneq aamma aningaaseriviup ukiumoortumik nalunaarusiaani tunngaviusunik paasissutissat. Misissueqqissaarnerullu paasinarsisippaa GrønlandsBANKENi tassaasoq aningaaserivik sutigut tamatigut nukittuumik patajaalluni inissisimasoq.